Türkmenistanyň Halk Maslahatynyň Başlygy Gurbanguly Berdimuhamedow Gadyr gijesiniň öňüsyrasynda agzaçar sadakasyny bermegi teklip etdi. Bu barada «Watan» habarlar gepleşiginde habar berildi.
7-nji martda Arkadag şäherine amala aşyran iş saparynyň dowamynda milli Lider häzirki wagtda mukaddes Oraza aýynyň dowam edýändigini, bu aýda ýurdumyzda we bütin yslam dünýäsinde sogap işleri bitirmegiň asylly däpdigini belledi.
Gurbanguly Berdimuhamedow agzaçar sadakalaryny bermek däbine eýermegiň möhümdigini nygtady. Ol şu ýyl Gadyr gijesiniň mart aýynyň 15-inden 16-syna geçilýän gijä düşýändigine ünsi çekdi. Şunuň bilen baglylykda, Halk Maslahatynyň Başlygy bu senäniň öňüsyrasynda agzaçar sadakasyny bermegiň maksadalaýyk boljakdygyny aýtdy.
Bu çärä hormatly ýaşulularyň, eneleriň, welaýatlaryň ymamlarynyň, din wekilleriniň we ýaşlaryň gatnaşmagyna garaşylýar.
