NASA Aý tozanyndan — regolitden kislorod almagyň täze usulyny görkezýän barlaglaryň netijelerini tanyşdyrdy. Agentligiň metbugat beýanatynda bellenilişi ýaly, bu täze açyş geljekki Aý missiýalarynda möhüm peýda berip biler.
Ýerden howany, suwy we ýangyjy daşamagyň örän gymmat düşýändigi we uly serişdeleri talap edýändigi üçin NASA çözgüt hökmünde başga asman jisimlerindäki ýerli serişdeleri ulanmak usulyny ösdürýär. Aýda bolsa şeýle serişde hökmünde onuň üstüni örtüp ýatan tozan, ýagny regolit hyzmat edýär.
«Carbothermal Reduction Demonstration» (CaRD) taslamasynyň çäklerinde toplanan Gün şöhlesiniň hasabyna işleýän synag reaktory döredildi. Şunda ýokary temperaturanyň täsiri bilen regolitden kislorod bölünip çykýar. Bu işiň goşmaça önümi hökmünde bolsa geljekki himiki reaksiýalarda ulanyp boljak kömürturşy gazynyň monooksidi emele gelýär.
NASA-nyň hünärmenleri: «CaRD topary Aýyň topragynyň nusgasyndan kislorod almagy başardy we Gün energiýasyny ulanyp, prototipiň doly synaglaryny geçirdi» diýip bellediler.
Bu tehnologiýalaryň Aý missiýalarynyň özbaşdaklygyny artdyrmagyna we çykdajylaryny azaltmagyna garaşylýar. Taslama birnäçe guramalaryň hyzmatdaşlygynda amala aşyrylýar we diňe bir Aýa däl, eýsem Marsa uçuşlar üçin hem geljegi uly ädim hasaplanýar.
