Britaniýanyň Heatherwick Studio binagärlik şereketi kosmosy öwrenmek üçin niýetlenen desganyň we syýahatçylyk merkeziniň funksiýalaryny birleşdirjek innowasion toplum bolan AlUla Manara taslamasy bilen tanyşdyrdy. Binanyň ýüzi teksturaly daş bilen örtüler.
Geljegiň bu desgasy Saud Arabystanynda gurular.
Gurluşyk üçin ýer Al-Ula sebitindäki ÝUNESKO-nyň Bütindünýä mirasynyň sanawyna girizilen Hegra şäheriniň golaýyndaky çöllükden saýlanyldy. Bu ýer astronomik gözegçilikler üçin iň amatly ýer, sebäbi ol ýeriniň asmany hemişe açyk we ýagtylygyň hapalanyşy minimaldyr.
Toplumyň binagärlik konsepsiýasy Älemiň gurluşyna we ýerli gumdaşlara salgylanýar. Gurluşyk üç sany kesişýän turba şekilli gabaralardan ybarat bolup, asmana uzaýan ägirt teleskoplary ýada salýar. Bu gurluşlaryň ujunda uly panorama aýnalary gurnalar, bu bolsa myhmanlara we alymlara ýyldyzlary hem-de çöl peýzažlaryny synlamaga mümkinçilik berer.
Bu toplumda ylmy-barlag laboratoriýalary we syýahatçylar üçin zolaklar ýerleşer. Şeýle hem, desganyň üçeginde planetariý, restoran we açyk howada synlaýyş meýdançasy bolar.
Bu taslama sebiti ösdürmegiň global baş meýilnamasynyň bir bölegidir. Geljekde bu ýerde dünýä derejesindäki astronomiki gurallar ýerleşdiriler we astrosyýahatçylygy söýüjiler üçin giňişleýin infrastruktura dörediler. Infrastruktura döwrebap teleskoplary, alymlar üçin myhmanhana otaglaryny, syýahatçylar üçin ýöriteleşdirilen myhmanhanany we gijeki asmana ýekebara gözegçilik etmek üçin özbaşdak, aýrybaşga pawilonlary öz içine alar.
