Tejen şäherinde döwrebaplaşdyrylan awtomenzil ulanylmaga berildi. Binanyň durkuny täzelemek işleri ýolagçy gatnatmak hyzmatlarynyň hilini ýokarlandyrmak we şäheriň ulag düzümini ösdürmek maksady bilen amala aşyryldy diýip, Awtomobil ulaglary ministrligi habar berýär.
Awtomenziliň binasy doly täzelendi. Onuň içinde ýolagçylar we sürüjiler üçin ähli amatly şertler döredildi. Döwrebaplaşdyrylandan soňra desga adaty tertipde işläp başlady.
Häzirki wagtda awtomenzilden 17 ugur boýunça yzygiderli awtobus gatnawlary amala aşyrylýar. Bu ugurlar Tejeni diňe bir şäheriň dürli künjekleri bilen däl, eýsem golaýdaky geňeşlikler we ilatly nokatlar bilen hem birleşdirýär.
Garaşsyzlyk, Täze oba, Birleşik, Agalaň, Ak-Altyn, B. Kerbabaýew, Garrygala, Göni Amaşa, Döwletli we Gurbandurdy geňeşliklerine awtobus gatnawy ýola goýuldy. Şeýle hem Bagtyýarlyk, Bitaraplyk we Gaňňaly şäherçelerine yzygiderli gatnawlar amala aşyrylýar.
Mundan başga-da, Babadaýhan etrabyna, şeýle hem Altyn-Asyr we Sarahs şäherlerine çenli ugurlar açyldy.
Bellenilişi ýaly, awtomenziliň täzelenmegi sebitiň ulag mümkinçiliklerini giňeldýär we ýaşaýjylar üçin gatnawlary has amatly edýär.
