Microsoft kompaniýasy her ýyl geçirilýän «Build 2026» maslahatynyň senesini mälim etdi. Çäre 2-3-nji iýun aralygynda San-Fransisko şäherinde bolar, onuň esasy sessiýalaryny bolsa onlaýn görnüşde mugt görüp bolar.
Maslahata ýüzbe-ýüz gatnaşmak üçin petegiň bahasy 1099 dollara deňdir. Hasaba alyş işleri eýýäm resmi saýtda açyldy. Maslahat emeli aň ulgamyndaky işläp düzüjiler, tehniki ýolbaşçylar we korporatiw pudagyň hünärmenleri üçin niýetlenendir.
Kompaniýanyň habar bermegine görä, maksatnama amaly işlere gönükdiriler. Iki günüň dowamynda gatnaşyjylar dürli modellerden we agentlerden başlap, köp modelli amallara çenli — giň gerimli emeli aň ulgamlaryny döretmek we ornaşdyrmak boýunça seminarlara gatnaşyp biler.
Gatnaşyjylar Microsoft-yň inženerleri bilen bilelikde dürli çözgütleriň üstünde işläp biler. Şeýle hem olara GitHub we Microsoft Foundry arkaly täze mümkinçilikler elýeterli bolar, hünärmenler bolsa işlenip düzülen çözgütleri hususy taslamalarda ulanmaga kömek eder.
Çykyş etjekleriň arasynda Microsoft-yň baş direktory Satýa Nadellanyň bolmagyna garaşylýar. Onuň esasy çykyşy ýerli wagt bilen 2-nji iýunda sagat 08:00-a meýilleşdirildi. Şeýle hem Skott Hanselman we GitHub-yň wekilleri çykyş eder.
