Angliýanyň Norfolk graflygynda seýrek duş gelýän altyndan taryhy gymmatlyk tapyldy. Seljerijileriň pikiriçe, bu şaýylar 865-nji ýylda Angliýa çozup giren skandinawlaryň Beýik butparazlar goşunynyň esgerine degişli bolupdyr. Tapyndyny metal detektorly höwesjeň arheolog Elsing obasynyň golaýyndaky meýdandan tapdy.
Boýna dakmak üçin niýetlenip ýasalan şaýylyk (kulon) takmynan 816-njy ýylda zikgelenen we Karolingler döwrüniň iň gowy zikge nusgalaryndan biri hasaplanylýan Beýik Karlyň ogly, imperator Lýudowik Takwanyň (814–840) altyn teňňesiniň öýkünmesidir.
Artefakt özüniň ýokary hilli ýasalyşy bilen tapawutlanýar. Ondaky ýazgylary aýyl-saýyl okap bolýar, imperatoryň kellesi bolsa örän gowy çekilen. Asykdaky iki sany deşik ony imperatoryň suraty daşyna seredip durar ýaly edip dakynmaga mümkinçilik beripdir.
Altyn – wikinger üçin baýlygyň we derejäniň nyşany bolup hyzmat edipdir. Olar teňňeleri seýrek ýagdaýda pul maksatly ulanyp, köplenç şaý-sep hökmünde dakynypdyrlar.
Angliýada wikingleriň altyn artefaktlaryna örän seýrek duş gelinýändigi sebäpli, bu tapyndynyň taryhçylar üçin uly ähmiýeti bardyr. Asyk Karolingler imperiýasy bilen Skandinawiýanyň arasyndaky gatnaşyklary tassyklaýar, şeýle hem Frisiýanyň ussahanalaryny öwrenmek üçin täze maglumatlary berýär. Häzirki wagtda gymmatly tapyndy Britaniýanyň kanunçylygyna görä «hazyna» hökmünde ykrar edilme tapgyryndan geçýär. Noriç galasynyň muzeýi ilkinji bolup, ony satyn almaga isleg bildirdi.
