Duşenbede türkmen-täjik hökümetara toparynyň 14-nji mejlisi geçirildi

2026-njy ýylyň 3-4-nji marty aralygynda Duşenbe şäherinde Söwda-ykdysady we ylmy-tehniki hyzmatdaşlyk boýunça bilelikdäki türkmen-täjik hökümetara toparynyň 14-nji mejlisi boldy. Türkmenistanyň Ministrler Kabinetiniň Başlygynyň Orunbasary Taňryguly Atahallyýewiň we Täjigistanyň Premýer-ministriniň orunbasary Sulaýmon Ziýozodanyň bilelikdäki başlyklyk etmeginde geçirilen mejlise iki ýurduň ministrlikleriniň hem-de pudaklaýyn edaralarynyň wekilleri gatnaşdy. Bu barada Türkmenistanyň DIM-i habar berýär.
Gepleşikleriň dowamynda taraplar söwda-ykdysady, energetika, ulag-aragatnaşyk, oba hojalygy, bilim we ylym, saglygy goraýyş, raýat awiasiýasy, medeni-ynsanperwer hyzmatdaşlyk ýaly ugurlarda ikitaraplaýyn gatnaşyklaryň häzirki ýagdaýyny hem-de geljegini ara alyp maslahatlaşdy.
Şeýle-de, 2024-nji ýylda Aşgabatda geçirilen türkmen-täjik hökümetara toparynyň 13-nji mejlisinde gazanylan ylalaşyklaryň ýerine ýetirilişine hem seredilip geçildi.
Mejlisde 2025-nji ýylda iki ýurduň arasyndaky haryt dolanyşygynyň 43,1 million ABŞ dollaryna deň bolup, 2024-nji ýyl bilen deňeşdirilende 17,1% artandygy bellenildi we bu görkezijiniň ykdysady gatnaşyklaryň depginli ösýändiginiň subutnamasydygy nygtaldy.
Şeýle hem taraplar hyzmatdaşlygyň şertnamalaýyn-hukuk binýadyny giňeltmek barada gürrüň etdi. Türkmen-täjik hökümetara toparynyň 14-nji mejlisiniň netijeleri boýunça Teswirnama gol çekildi.