4-nji martda Magtymguly adyndaky milli sazly drama teatrynda Türkmenistanyň ýokary okuw mekdepleriniň talyp gyzlarynyň arasynda geçirilýän «Talyp gözeli — 2026» gözellik bäsleşiginiň jemleýji tapgyry boldy. Emin agzalarynyň karary bilen bäsleşigiň baş baýragyna Magtymguly adyndaky Türkmen döwlet uniwersitetiniň fizika fakultetiniň 2-nji ýyl talyby Aýjan Baýramowa mynasyp boldy.
Bäsleşik Türkmenistanyň Bilim ministrligi, Magtymguly adyndaky Ýaşlar guramasynyň Merkezi geňeşi we Zenanlar birleşiginiň Merkezi Geňeşi tarapyndan guraldy. Bu bäsleşik her ýyl Halkara zenanlar gününiň öňüsyrasynda geçirilýär.
Final tapgyryna öz okuw mekdeplerinde deslapky tapgyrlardan geçen 24 sany talyp gyz gatnaşdy. Gatnaşyjylar döredijilik ukyplaryny — aýdym, goşgy we sahna çykyşlaryny görkezdi. Mundan başga-da, bäsleşige gatnaşyjylar milli tagamymyz bolan unaş kesmekde öz aşpezlik ukyplaryny, şeýle hem el işlerini we keşde çekmek ussatlyklaryny görkezdi.
Beýleki baýrakly orunlar aşakdaky ýaly paýlandy:
1-nji orun:
- Güljeren Meläýewa — Döwletmämmet Azady adyndaky Türkmen milli dünýä dilleri institutynyň iňlis dili we edebiýaty fakultetiniň 1-nji ýyl talyby.
2-nji orun:
- Aýgül Kakaýewa — Türkmen döwlet medeniýet institutynyň medeni miras fakultetiniň 4-nji ýyl talyby;
- Merjen Töräýewa — Türkmen döwlet maliýe institutynyň salgytlar we salgyt salmak fakultetiniň 3-nji ýyl talyby.
3-nji orun:
- Amansoltan Orazmämmedowa — S.A.Nyýazow adyndaky Türkmen oba hojalyk uniwersitetiniň agronomçylyk fakultetiniň 5-nji ýyl talyby;
- Läle Gylyçdurdyýewa — Türkmen döwlet binagärlik-gurluşyk institutynyň inžener-mehanika fakultetiniň 1-nji ýyl talyby;
- Aýlar Muhammedowa — Türkmenistanyň Döwlet ykdysadyýet we dolandyryş institutynyň maliýe fakultetiniň 3-nji ýyl talyby.
Şeýle hem birnäçe gatnaşyja ýörite ugurlar boýunça baýraklar berildi. Finala gatnaşyjylaryň ählisine sowgatlar we Hormat hatlary gowşuryldy.
