Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň mejlisini geçirdi. Onda harby we hukuk goraýjy edaralaryň şu ýylyň ýanwar–fewral aýlarynda bitiren işleriniň netijelerine seredildi diýip, TDH habar berýär.
Duşuşygyň dowamynda edaralaryň ýolbaşçylary Ýaragly Güýçleri ösdürmegiň maksatnamasynda bellenilen wezipeleriň ýerine ýetirilişi, sanly ulgamlaryň ornaşdyrylyşy we harby düzümleriň maddy-enjamlaýyn binýadynyň berkidilmegi barada hasabat berdiler.
Mejlisde Milli goşunymyzy döwrebaplaşdyrmak, konstitusion gurluşy goramak we hukuk tertibini üpjün etmek meselelerine aýratyn üns berildi. Türkmenistanyň goranmak, içeri işler, milli howpsuzlyk ministrlikleriniň we beýleki edaralaryň ýolbaşçylary işgärleriň hünär derejesini ýokarlandyrmak hem-de harby gullukçylaryň durmuş-ýaşaýyş şertlerini gowulandyrmak boýunça görülýän çäreler barada maglumat berdiler.
Döwlet Baştutany Türkmenistanyň goranyş häsiýetli Harby doktrinasyna laýyklykda, ýurduň goranmak ukybyny berkitmek, howpsuzlygyny we çäk bitewüligini ýokary derejede üpjün etmek, Watan goragçylarynyň we olaryň maşgala agzalarynyň ýaşaýyş-durmuş şertlerini has-da ýokarlandyrmak boýunça yzygiderli çäreleriň durmuşa geçirilýändigini aýtdy hem-de bu işleriň mundan beýläk-de dowam etdiriljekdigini belledi.
Hasabatlaryň netijeleri boýunça Türkmenistanyň Prezidenti Ýaragly Güýçleri ösdürmek üçin dünýäniň öňdebaryjy tejribesini işjeň öwrenmegi, kanunlaryň ýerine ýetirilişine berk prokuror gözegçiligini üpjün etmegi, hukuk bozulmalarynyň we ýol-ulag hadysalarynyň öňüni almagy güýçlendirmegi, şeýle hem kazyýet ulgamynyň netijeliligini ýokarlandyrmagy tabşyrdy.
Döwlet Baştutany şeýle hem döwlet serhetlerini dost-doganlyk serhedi hökmünde ygtybarly goramagyň, gümrük gözegçiligini kämilleşdirmegiň, halkara tejribäni ulanmak arkaly hukuk binýadyny döwrebaplaşdyrmagyň, migrasiýa hyzmatlarynyň hilini ýokarlandyrmagyň, ähli ugurlarda sanly ulgamy ornaşdyrmagyň zerurdygyny belledi.
