Döwlet gullugy akademiýasynda kämil hünärmenleri taýýarlamagyň meseleleri maslahatlaşyldy

Türkmenistanyň Prezidentiniň ýanyndaky Döwlet gullugy akademiýasynda «Berkarar döwletiň täze eýýamynyň Galkynyşy döwründe kämil döwlet gullukçylaryny taýýarlamagyň ähmiýeti, olaryň dolandyryş işinde tutýan orny» atly ylmy-amaly maslahat geçirildi. Çärä akademiýanyň professor-mugallymlary, magistrleri we dürli ministrlikleriň hem-de ýokary okuw mekdepleriniň wekilleri gatnaşdy.
Maslahatyň dowamynda döwlet gullukçylarynyň hünär derejesini ýokarlandyrmagyň we olary gaýtadan taýýarlamagyň döwrüň talaplaryna laýyk gelmelidigi nygtaldy. Häzirki wagtda akademiýada hünär ýokarlandyrmak boýunça 5 aýlyk we gaýtadan taýýarlamak boýunça 2 ýyllyk okuw maksatnamalary alnyp barylýar. Çykyş edenler bu okuwlary tamamlan hünärmenleriň ýurduň edara-kärhanalarynda netijeli iş alyp barýandyklaryny belledi.
Ylmy-amaly maslahat «Milli döwlet dolandyrylyşynyň taryhy kökleri» hem-de «Sanly ykdysadyýetiň ösüşi döwründe döwlet gullukçylaryny taýýarlamagyň meseleleri» atly bölümçelerde dowam etdirildi. Bölümçe mejlislerinde döwlet Baştutanynyň 2020-nji ýylyň 24-nji ýanwarynda gol çeken «Türkmenistanyň Prezidentiniň ýanyndaky Döwlet gullugy akademiýasynyň meseleleri hakynda» Kararynyň ähmiýeti barada durlup geçildi. Bu resminama esasynda tassyklanan täze Düzgünnamanyň we okuwa kabul etmegiň Tertibiniň akademiýanyň ylmy-usulyýet binýadyny döwrebaplaşdyrmaga uly itergi berendigi aýratyn bellenildi.