Pekin uniwersitetiniň gözlegçi hünärmenleri dünýäde iň kiçi we iň az energiýa sarp edýän tranzistorlary işläp düzdüler. Bu täze tehnologiýa geljekde emeli aň üçin niýetlenen has güýçli çipleriň esasyny düzüp biler.
Bu açyş segnetoelektrik meýdan tranzistorlary (FeFET) diýlip atlandyrylýan tehnologiýa degişlidir. Bu tranzistorlaryň esasy aýratynlygy — olaryň ynsan beýnisiniň işleýiş maksadyny gaýtalamagynda bolup, olar maglumaty saklamagy we ony işläp taýýarlamagy birleşdirýärler. Adaty kremniý çipleri bolsa, maglumaty saklamak we ony işlemek üçin aýry-aýry bölekleri ulanýarlar. Çylşyrymly hasaplamalar geçirilende, maglumatlar yzygiderli bu bölekleriň arasynda göçürilýär. Netijede energiýa köp sarp edilýär we çip aşa gyzýar. Emeli aň goşundylarynyň çalt ösmegi bolsa has tygşytly we güýçli prosessorlara bolan islegi artdyrýar.
FeFET-leriň öňki esasy kemçiligi maglumatlary ýazmak üçin ýokary elektrik güýjüni talap etmegidi. Adaty shemalar 0,7 woltda işleýän bolsa, öňki FeFET-ler 1,5 wolt talap edýärdi.
Hytaýly alymlaryň döreden bir nanometr ölçegdäki dolandyryjy elektrodly täze tranzistor bary-ýogy 0,6 wolt bilen işleýär, öňkülerden 10 esse az energiýa sarp edýär we örän çalt — 1,6 nanosekundda seslenýär.
Pekin uniwersiteti häzirkizaman tehnologiýa dünýäsinde uly gyzyklanma döreden bu açyşyny eýýäm patentleşdirdi.
