Aşgabatda «Zenan we tebigat» atly döredijilikli duşuşyk geçirildi

Halkara zenanlar güni mynasybetli paýtagtdaky Halkara ylmy-tehnologiýa parkynda «Zenan we tebigat» atly döredijilikli duşuşyk geçirildi. «Ýaş tebigatçy» jemgyýetçilik guramasynyň başlangyçlary we BMG-niň Ösüş Maksatnamasynyň Türkmenistandaky «Milli derejede kesgitlenen goşantlary (MDKG 3.0) täzelemek işine goldaw bermek» taslamasynyň tehniki goldawy bilen geçirilen bu çäre kyrka golaý gelin-gyzy bir ýere jemledi.
Duşuşyga Türkmenistanyň Daşky gurşawy goramak ministrliginiň wekilleri, bilim, saglygy goraýyş we köpçülikleýin habar beriş serişdeleriniň işgärleri gatnaşyp, jemgyýetde ekologiýa medeniýetini kemala getirmekde zenanlaryň eýeleýän möhüm orny barada çykyş etdi. «Ýaş tebigatçy» jemgyýetçilik guramasynyň ýolbaşçysy Leýli Şyhmedowa öz çykyşynda zenan gözelligi bilen tebigatyň sazlaşygyny ýaş nesilleriň aňynda berkitmegiň guramanyň esasy maksatlarynyň biridigini nygtady.
Çäräniň dowamynda BMGÖM-iň hünärmenleri we ekologiýa meýletinçileri howanyň üýtgemegi baradaky halkara borçnamalar we bu ugurda durmuşa geçirilýän taslamalar boýunça özara tejribe alyşdy. Gatnaşyjylar özlerini gyzyklandyrýan sowallara hünärmenlerden anyk jogaplary alyp, gyzykly söhbetdeşlik gurady.
Dabaranyň ahyrynda gatnaşyjylara «Ýaş tebigatçy» guramasynyň adyndan ýadygärlik sowgatlar gowşuryldy. Bu duşuşyk ýaş gelin-gyzlaryň daşky gurşawy goramak ugrundaky işjeňligini artdyrmakda we hünär tejribesini baýlaşdyrmakda netijeli meýdança öwrüldi.