26-njy fewralda Lankaster-haus binasynda Ministrler Kabinetiniň Başlygynyň orunbasary, daşary işler ministri Raşid Meredowyň ýolbaşçylygyndaky türkmen wekiliýeti Britaniýanyň işewürler jemgyýetiniň wekilleri bilen geçirilen işewürlik kabul edişligine gatnaşdy. Bu barada Türkmenistanyň DIM-i habar berýär.
Beýik Britaniýanyň Premýer-ministriniň orunbasary Dewid Lemmi gutlag sözi bilen çykyş edip, Merkezi Aziýa bilen ykdysady gatnaşyklary berkitmegiň we durnukly bilelikdäki taslamalary ösdürmegiň ähmiýetini belledi. Soňra sebit ýurtlarynyň daşary işler ministrleri gysgaça beýanatlar bilen çykyş etdi.
Türkmenistanyň daşary syýasat edarasynyň ýolbaşçysy öz çykyşynda häzirki döwrüň dünýä söwdasynyň we energetikanyň özgermegi, täze ulag geçelgeleriniň we ykdysady merkezleriň emele gelmegi bilen häsiýetlendirilýändigini, munda bolsa Türkmenistanyň möhüm orun eýeleýändigini nygtady.
Energetika ulgamyna aýratyn üns berildi: Türkmenistan tebigy gazyň dünýädäki iň iri gorlarynyň birine eýedir we ygtybarly hyzmatdaş hökmündäki abraýyny saklaýar. Türkmen tarapy üpjünçiligiň täze ugurlary, uzak möhletleýin şertnamalar we bilelikdäki taslamalar, şol sanda gaýtadan dikeldilýän energetika boýunça gepleşiklere taýýardygyny bildirdi.
Şeýle hem Orta geçelgäni ösdürmek we ulag infrastrukturasyny, şol sanda Türkmenbaşy halkara deňiz portuny döwrebaplaşdyrmak meseleleri maslahatlaşyldy, bu bolsa britan işewürleri üçin täze mümkinçilikleri açýar. Hukuk kepillikleri, halkara arbitraž gurallary we ýörite ykdysady düzgünler arkaly amatly maýa goýum gurşawynyň döredilýändigi bellenildi.
Çäräniň ahyrynda özara hormat goýmak we taraplaryň bähbitlerine esaslanýan uzak möhletleýin hyzmatdaşlygy ýola goýmaga taýýarlyk tassyklanyldy.
