Türkmenistanyň Prezidenti Serdar Berdimuhamedow 2026–2052-nji ýyllar üçin Türkmenistanda ylmy-lukmançylyk diplomatiýasyny ösdürmegiň Milli strategiýasyny taýýarlamagy tabşyrdy. Degişli tabşyryk anna güni sanly ulgam arkaly geçirilen Hökümet mejlisinde berildi diýip, TDH habar berýär.
Mejlisde wise-premýer B.Mämmedow ýurtda ylmy-lukmançylyk diplomatiýasyny ösdürmek boýunça alnyp barylýan işler barada hasabat berdi. Ol Türkmenistanda saglygy goraýyş ulgamynda oňyn tejribeleriň yzygiderli ornaşdyrylýandygyny, Bütindünýä Saglygy Goraýyş Guramasynyň halkara talaplaryna laýyk gelýän ylmy-kliniki merkezleriň, hassahanalaryň, şypahanalaryň we derman senagaty kärhanalarynyň gurluşygynyň alnyp barylýandygyny habar berdi. Şeýle hem lukmançylyk ylmy ösdürilýär we bu ugurda halkara hyzmatdaşlygy berkidilýär.
Wise-premýeriň sözlerine görä, durmuşa geçirilýän işler ilatyň saglyk ýagdaýynyň gowulanmagyna, ählumumy ylmy-lukmançylyk diplomatiýasynyň ösmegine we ýurduň halkara abraýynyň ýokarlanmagyna ýardam berýär. Şunuň bilen baglylykda, ol döwlet Baştutanynyň garamagyna degişli teklibi hödürledi.
Türkmenistanda lukmançylyk ylmyny ösdürmek we halkara özara gatnaşyklary giňeltmek boýunça toplumlaýyn çäreleriň görülýändigini belläp, Prezident wise-premýere agzalan strategiýany taýýarlamak işlerini geçirmegi tabşyrdy.
