Türkmenistanda Halkara zenanlar güni mynasybetli geçiriljek çärelere taýýarlyk işleri dowam edýär. Geçiriljek dabaralaryň maksatnamasy barada Ministrler Kabinetiniň anna güni bolan mejlisinde wise-premýer B.Seýidowa hasabat berdi diýip, TDH habar berýär.
Bellenişi ýaly, degişli çäreler Aşgabat we Arkadag şäherlerinde hem-de ýurdumyzyň welaýatlarynda geçiriler. Jemgyýetçilik guramalarynyň merkezinde “Ene hüwdüsi — iň kämil eser” atly dabaraly maslahatyň we serginiň geçirilmegi meýilleşdirilýär.
Döwlet muzeýinde “Ogulabat ejäniň el hünäri türkmen zenanlarynyň görelde mekdebidir” atly tematiki çäre geçiriler. Şekillendiriş sungaty muzeýinde bolsa “Şekillendiriş sungatynda zenan waspy” atly sergi açylar.
Baýramçylyk günleriniň maksatnamasynda şeýle hem degişli bäsleşikleriň jemini jemlemek, teatrlarda sahna oýunlaryny, ýurdumyzda düşürilen kinofilmleriň görkezilişini we baýramçylyk konsertlerini geçirmek göz öňünde tutulýar.
Hormatly Prezidentimiz Serdar Berdimuhamedow medeniýet we sungat ussatlarynyň gatnaşmagynda geçiriljek baýramçylyk konsertiniň ýokary guramaçylyk derejesini üpjün etmegi tabşyrdy.
Ýatlap geçsek, 2021-nji ýylda Türkmenistanyň Prezidentiniň enesi we Halk Maslahatynyň Başlygynyň käbesi Ogulabat Berdimuhamedowa 1971-nji ýylda özüniň işläp bejeren kürtesini Döwlet medeniýet merkeziniň Döwlet muzeýine sowgat beripdi.
Iki ýyldan soň, muzeýiň gymmatlyklarynyň üsti Ogulabat ejäniň taýýarlan alajalary we olary taýýarlamak üçin ulanan guraly bilen ýetirildi. Ogulabat eje öz ömrüni çagalary terbiýelemäge hem-de nesilden-nesle geçip gelýän el hünäri däplerini gorap saklamaga bagyşlapdy.
