2026-njy ýylyň 25-nji fewralynda Gruziýanyň paýtagtyndaky Kino öýünde «Medeniýet dünýäni halas eder» atly täze dokumental filmiň ilkinji görkezilişi geçirildi. Bu kino eseri döwletara gatnaşyklary ösdürmekde we halklaryň arasynda özara ynamy berkitmekde medeniýetiň tutýan ornuny görkezýär.
Filmiň mazmuny Türkmenistanyň, Gruziýanyň we Hytaýyň medeni köpdürlüligine hem-de bu ýurtlaryň ynsanperwer hyzmatdaşlygy pugtalandyrmaga goşýan goşantlaryna gönükdirilendir. Çärä Türkmenistanyň we Hytaýyň Gruziýadaky Ilçileri, Gruziýanyň Parlamentiniň wekilleri, filmiň režissýory T.Malaniýa hem-de ylmy-döredijilik intelligensiýa wekilleri gatnaşdy.
Türkmenistanyň Ilçisi D.Seýitmämmedow öz çykyşynda medeni diplomatiýanyň halklary ýakynlaşdyrmakda iň ygtybarly guraldygyny belledi. Ol filmiň parahatçylygy we durnuklylygy üpjün etmekde döwletleriň arasyndaky ruhy baglanyşygy has-da güýçlendirjekdigine ynam bildirdi.
Tanyşdyrylyş dabarasynda çykyş eden beýleki wekiller hem häzirki wagtda medeni gepleşikleriň global meseleleri çözmekde we dostlukly gatnaşyklary täze derejä çykarmakda ägirt uly ähmiýete eýedigini nygtady.
