Ispaniýanyň Maximiliana startapy 100 we ondan hem uly ýaşly adamlar üçin umumy wideoaragatnaşyk duşuşygyny gurnady. Bu täsin duşuşyga ýurduň her awtonom birleşiginden bir wekil – jemi 17 zenan gatnaşdy. Bu barada RTVE habar berýär.
Gatnaşyjylaryň ählisiniň ýaşynyň jemi 1757 ýyla deň boldy. Olaryň arasynda iň ýaşy 100 ýaşyndaky kataloniýaly Mariýa Pakita, iň ulusy bolsa Kantabriýadan 111 ýaşly ýurduň iň köp ýaşly üç adamsynyň biri, monah uýa Rozario boldy.
Wideojaň wagtynda zenanlar öz ýaşlygy, maşgalalary we iň gowy görýän ýerleri barada gürrüň berdiler. Meselem madridli Pepita joralary bilen tansa gatnaýşy, milli «çotis» tansyny ýerine ýetirişi barada ýatlady. La-Riohaly Karmen hem geljekki adamsy bilen ilkinji gezek tans meýdançasynda tanyşandygyny aýtdy.
Mursiýaly Antoniýa öz toýy we iki çaganyň ejesi bolşy baradaky ýakymly pursatlary paýlaşdy. Kastiliýa-la-Mançaly Pakita özüniň dogduk Eskamilýa obasy barada we hemişe öýüne dolanmagy gowy görýändigi barada gürrüň berdi. Aragonly Karolina bolsa garrylar öýündäki durmuşy barada durup geçdi we işgärlere minnetdarlyk bildirdi.
Täsin çäräniň ahyrynda gatnaşyjylara ýadygärlik ýazgy tagtalary gowşuryldy. Taslamanyň esaslandyryjysy Horhe Terreu bolsa ajaýyp zenanlar üçin «Taryhly eller» atly goşgusyny okap berdi.
Bu duşuşygy gurnan Maximiliana startapy ýörite garry adamlar üçin niýetlenen smartfonlary öndürýär. Bu enjamyň dizaýny çylşyrymly sazlamalary talap etmezden, ulanmak üçin örän aňsat görnüşdedir.
