Ylmy-medeni özara gatnaşyklar türkmen wekiliýetiniň Londona amala aşyran iş saparynyň dowamynda üns merkezinde duran esasy meseleleriň biri boldy. Saparyň çäklerinde Türkmenistanyň daşary işler ministri Raşid Meredowyň ýolbaşçylygyndaky wekiliýet London uniwersitet kollejiniň (UCL) Arheologiýa institutynyň professory Timoti Uilýams bilen duşuşdy. Bu barada daşary syýasat edarasynyň metbugat gullugy habar berýär.
Söhbetdeşligiň dowamynda britan alymynyň Türkmenistanyň özboluşly arheologik mirasyny, ilkinji nobatda bolsa, gadymy Merwiň ýadygärliklerini öwrenmekde we aýap saklamakda köp ýyllaryň dowamynda alyp baran netijeli işleri aýratyn bellenildi.
Duşuşygyň esasy netijesi Türkmenistanyň Medeniýet ministrligi bilen UCL-iň Arheologiýa institutynyň arasynda Ylalaşyga gol çekilmegi boldy. Bu resminama hyzmatdaşlygyň täze tapgyry üçin binýat bolup hyzmat eder. Onuň çäginde bilelikdäki arheologik ekspedisiýalary guramak, ylmy barlaglary we muzeý-sergi hyzmatdaşlygyny ösdürmek göz öňünde tutulýar. Mundan başga-da, ylalaşyk ýokary derejeli hünärmenleri taýýarlamak babatda işjeň gatnaşyklary göz öňünde tutýar.
