2026-njy ýylyň 26-njy fewralynda Lankaster-haus binasynda Merkezi Aziýa ýurtlarynyň we Beýik Britaniýanyň daşary işler ministrleriniň syýasy dialogy çuňlaşdyrmaga hem-de maýa goýum hyzmatdaşlygyny giňeltmäge bagyşlanan mejlisi geçirildi. Bu barada Türkmenistanyň DIM-i habar berýär.
Türkmenistanyň daşary işler ministri Raşid Meredow öz çykyşynda «Merkezi Aziýa – Beýik Britaniýa» görnüşinde ilkinji ministrler duşuşygyny geçirmek başlangyjy üçin britan tarapyna minnetdarlyk bildirdi.
Mejlisiň dowamynda Merkezi Aziýa ýurtlarynyň durnukly ykdysadyýeti emele getirmäge gyzyklanma bildirýändigini nygtaldy we Birleşen Patyşalyk bilen özara gatnaşyklaryň esasy ileri tutulýan ugurlary kesgitlenildi.
Şolaryň hatarynda energetika we dekarbonizasiýa, şol sanda nebitgaz pudagyny döwrebaplaşdyrmak we gaýtadan dikeldilýän energiýa çeşmelerini ösdürmek, şeýle hem döwrebap maliýe we söwda tehnologiýalaryny ornaşdyrmak üçin Londonyň dünýä maliýe merkezi hökmündäki tejribesini ulanmak meselelerine aýratyn üns berildi.
Tehnologiýa pudagyndan başga-da, hukuk, konsalting we audit ugurlaryndaky hünär hyzmatlary, şeýle hem Merkezi Aziýanyň üstaşyr kuwwatyny berkitmek üçin ulag-logistika ulgamyny ösdürmek ileri tutulýan ugurlar hökmünde görkezildi.
Söhbetdeşligiň çäginde gatnaşyjylar halkara gün tertibiniň we sebit howpsuzlygynyň möhüm meselelerine hem degip geçdi.
Çykyşynyň ahyrynda R.Meredow Türkmenistanyň anyk netijeleri gazanmaga gönükdirilen köptaraplaýyn gepleşikleriň, şeýle-de ikitaraplaýyn gatnaşyklaryň çäginde işjeň we mazmunly hyzmatdaşlyga taýýardygyny tassyklady.
