2026-njy ýylyň 26-njy fewralynda Beýik Britaniýa amala aşyrylan iş saparynyň çäginde Türkmenistanyň daşary işler ministri Raşid Meredow Londonda möhüm duşuşyga gatnaşdy. Duşuşyk London gazna biržasynyň baş ýerine ýetiriji direktory Juliýa Enn Hoggettiň we Beýik Britaniýanyň Maliýe ministrliginiň (UK Treasury) ykdysady sekretary Lýusi Rigbiiniň gatnaşmagynda geçirildi. Bu barada Türkmenistanyň DIM-iniň metbugat gullugy habar berýär.
Taraplar infrastruktura hem-de energetika taslamalaryny durmuşa geçirmek üçin Türkmenistanyň ykdysadyýetine Britaniýanyň uzak möhletleýin maýasyny çekmek meselelerine üns berdi. Türkmen wekiliýeti Londonyň dünýä maýa goýum akymlaryny emele getirýän ählumumy maliýe merkezi hökmündäki strategik ornuny nygtady. Häzirki wagtda Türkmenistanda senagat, gurluşyk we söwda pudaklarynda Britaniýanyň gatnaşmagynda 30-a golaý kärhananyň üstünlikli işleýändigi bellenilip geçildi.
Hyzmatdaşlygy utgaşdyrmakda söwda-ykdysady gatnaşyklarynyň oňyn depginde ösmegine ýardam edýän Türkmen-britan Söwda we senagat geňeşine aýratyn ähmiýet berildi.
Duşuşygyň ahyrynda türkmen tarapy durnukly maliýeleşdiriş, audit, ätiýaçlandyryş, döwrebap bank işi we sanly çözgütleri ornaşdyrmak ýaly geljegi uly ugurlarda hyzmatdaşlygy giňeltmäge gyzyklanma bildirdi.
