Maltada kakaonyň ysy gelýän, süýji-şeker dükanlarynyň witrinasy ýaly lowurdaýan we şol bir wagtyň özünde resmi taýdan dünýä rekordy hökmünde ykrar edilen otly peýda boldy. Gürrüň taryhdaky iň uzyn şokolad otlusy barada gidýär.
Maltaly şokolad aşpezi Endrýu Farrujiýa, uzynlygy 55,27 metr bolan şokolad heýkelini döredip, üçünji gezek Ginnesiň rekordlar kitabyna girdi. Deňeşdirmek üçin: bu adaty olimpiýa basseýninden (50 m) hem uly diýmekdir.
Skulptura köne döwrüň otlusy görnüşinde ýerine ýetirilen bolup, bir lokomotiwden we 22 wagondan ybaratdyr. Her wagonyň agramy 160 kilograma çenli ýetýär we dolulygyna belgiýa şokoladyndan ýasalypdyr.
Taslamanyň üstündäki iş takmynan bir ýarym ýyl dowam etdi. Takmynan bir ýyl taýýarlyga we taslamalaşdyrmaga, ýene dört aý bolsa önümçiligiň özüne sarp edildi. Şokolady guýmazdan ozal, aşpez ähli elementleriň toýun modellerini el bilen ýasady. Umumylykda, takmynan 5 müň detal ýonulyp ýasaldy, soňra bolsa olar uly aşpezler topary tarapyndan bir bitewi gurluşa ýygnaldy.
Taslama şol bir wagtyň özünde bilim beriş äheňli hem boldy: ony döretmäge Maltanyň we Italiýanyň aşpezlik mekdepleriniň talyplary gatnaşdy. Farrujiýanyň özi Syýahatçylyk barlaglary institutynda aşpezlik sungatyndan we şokolad aşpezliginden ders berýär, rekordy bolsa institutyň we ýurduň geljegine goşant diýip atlandyrýar.
Iň töwekgelçilikli tapgyr transportirlowka boldy. Äpet ölçegleri sebäpli, otlyny her bir detalyny üns bilen gaplap, bölekleýin Milana äkitmeli boldy. Netijede, ähli bölekler hiç hili zeper ýetmezden baryp ýetdi.
Işdä açyjy görnüşine garamazdan, otly iýmit üçin ýaramsyzdyr. Şokoladyň bir bölegi talyplary okatmak üçin gaýtadan erediler, galan bölegi bolsa haýwanlara iým bolar.
