Adama akylly bolmak üçin 20 ýyl we tonnalarça azyk gerek: Altman emeli aň bilen adamyň energiýa sarp edişini deňeşdirdi

OpenAI-yň ýolbaşçysy Sem Altman emeli aň ulgamlarynyň energiýa netijeliliginiň adam aňynyň ösüşi üçin sarp edilýän çykdajylar bilen deňeşdirerlikdigini ýa-da ondan hem ýokarydygyny öňe sürýär diýip, Tom's Hardware habar berýär.
Kompaniýanyň ýolbaşçysy öz garaýyşlaryny The Indian Express neşiriniň çäresinde we X sosial ulgamynda beýan etdi.
Köp bilermenler adam beýnisiniň az energiýa bilen köp iş bitirýändigini, emeli aňy okatmagyň bolsa uly maglumat merkezleri bilen ägirt möçberde energiýa talap edýändigini aýdýar. Şunuň esasynda EA-nyň netijeliligi adamyňkydan pes diýlen düşünje gelip çykýar.
Ýöne Sem Altmanyň pikiriçe, neýroulgamlaryň we beýniniň sarp edýän energiýasyny gönüden-göni deňeşdirmek nädogry bolar, sebäbi bu ýagdaýda adamyň kemala gelmegi üçin öňünden sarp edilýän maýa goýumlary hasaba alynmaýar. Altman akyl taýdan kämil şahsyýetiň kemala gelmegi üçin 20 ýyl töweregi ömrüň we ägirt uly möçberde azyk önümleriniň gerekdigini nygtaýar.
«Adamlar emeli aň modelini okatmak üçin näçeräk energiýanyň gerekdigi barada gürleýär... Ýöne adamy okatmak üçin hem köp energiýa gerek ahyryn. Akylly bolmazdan ozal, munuň üçin 20 ýyl töweregi ömür we bu döwürde iýjek ähli iýmitiňiz sarp edilýär» – diýip, Altman ýazdy.
Mundan başga-da, OpenAI-yň ýolbaşçysy hasaplamalarda bilimleri toplap gelen ýüz milliardlarça ata-babalaryň ewolýusiýa ýoluny hem nazara almagy teklip etdi.
Şeýlelikde, onuň logikasyna görä, bularyň ählisini göz öňünde tutsaň, onda EA-ny döretmek we okatmak üçin sarp edilýän energiýa o diýen gözçykgynç görünmeýär, käbir ýagdaýlarda hatda netijeli hem bolup biler.
Pudagyň bilermenleri bu aýdylanlara şübheli garap, OpenAI-yň tehnologiýalarynyň özüniň hem adam aňynyň önümidigini belledi.
Sözüniň ahyrynda kompaniýanyň ýolbaşçysy ilat bilen serişdeler ugrunda bäsleşigi aradan aýyrmak üçin durnukly energiýa çeşmelerine geçmegiň zerurdygyny görkezdi.