Türkmenistanyň Mejlisiniň Başlygy D.Gulmanowanyň Gruziýa amala aşyran resmi saparynyň çäklerinde ýurduň ýokary derejeli ýolbaşçylary bilen duşuşyklary boldy. Bu barada Mejlisiň metbugat gullugy habar berýär.
Saparyň barşynda Mejlisiň Başlygy Gruziýanyň Prezidenti Mihail Kawelaşwili bilen duşuşyp, oňa Türkmenistanyň hormatly Prezidenti Serdar Berdimuhamedowyň hem-de türkmen halkynyň Milli Lideri, Türkmenistanyň Halk Maslahatynyň Başlygy hormatly Gurbanguly Berdimuhamedowyň dostlukly salamlaryny we iň gowy arzuwlaryny ýetirdi.
Gepleşikleriň barşynda iki ýurduň arasynda köp ýyllardan bäri dowam edip gelýän syýasy, söwda-ykdysady we ynsanperwer ugurlardaky hyzmatdaşlygyň parlament diplomatiýasynyň üsti bilen has-da pugtalandyrylýandygy bellenildi. Taraplar energetika, ulag-logistika we täze tehnologiýalary ornaşdyrmak ýaly strategik pudaklarda gatnaşyklaryň işjeňleşdirilmeginiň ykdysady ösüşlere oňyn täsir edýändigini nygtap, türkmen-gruzin dostlukly gatnaşyklarynyň täze belentliklere ýetjekdigine ynam bildirdi.
Günüň ikinji ýarymynda Türkmenistanyň Mejlisiniň Başlygynyň Gruziýanyň Premýer-ministri Irakliý Kobahidze bilen duşuşygy boldy. Mejlisiň Başlygy Premýer-ministre Türkmenistanyň ýokary ýolbaşçy düzüminiň hoşniýetli sözlerini ýetirdi.
Duşuşygyň dowamynda ikitaraplaýyn hem-de halkara guramalaryň çäklerinde birek-biregiň başlangyçlaryny goldamagyň ähmiýeti barada gürrüň edildi. Taraplar parlamentarileriň özara saparlarynyň, şol sanda Gruziýanyň Parlamentiniň Başlygynyň Türkmenistana amala aşyran saparynyň we türkmen wekiliýetiniň şu gezekki resmi saparynyň parlamentara gatnaşyklary durnukly ösdürmekdäki ornuny aýratyn belledi. Gepleşikleriň ahyrynda özara hormat goýmak we deňhukuklylyk ýörelgelerine esaslanýan hökümetara hyzmatdaşlygy mundan beýläk-de ösdürmekde parlament diplomatiýasynyň mümkinçiliklerini ulanmaga taýýardyklary tassyklanyldy.
Şeýle-de, resmi saparyň çäklerinde Türkmenistanyň Mejlisiniň Başlygynyň ýolbaşçylygyndaky türkmen wekiliýeti Tbilisi şäherindäki Gahrymanlar meýdanynda Gruziýanyň gahrymanlarynyň hormatyna gül dessesini goýmak dabarasyna gatnaşdy.
