Türkmenistanyň Halk Maslahatynyň Başlygy Gurbanguly Berdimuhamedow ABŞ-a amala aşyran saparynyň çäginde Florida ştatynyň Wellington şäherinde ýerleşýän «La Victoria» atçylyk toplumyna bardy.
Bu toplum işgärler üçin ýaşaýyş jaýlaryny, athanalary, türgenleşik meýdançalaryny we çüwdürimli köli hem-de beýleki ugurdaş desgalary özünde jemleýär. Merkeziň çäginde üsti ýapyk manež, at esbaplaryny saklamak üçin jaýlar we haýwanlary suwa ýakmak üçin açyk zolak hereket edýär. «La Victoria» toplumynda atçylyk sporty boýunça bäsleşikleri guramak, birnäçe aýlap dowam edýän konkur boýunça halkara ýaryşlary geçirmek üçin ähli zerur şertler bar.
Gurbanguly Berdimuhamedow atlaryň sany we tohumlary bilen tanyşdy, olary saklamagyň usullaryny we degişli hünärmenleriň iş tertibini öwrendi. Şeýle-de, atlary professional ýaryşlara taýýarlamak işlerine aýratyn üns berildi.
Taraplar türkmen we amerikan atşynaslarynyň arasyndaky özara gatnaşyklary berkitmek üçin uly mümkinçilikleriň bardygyny nygtady. Halk Maslahatynyň Başlygy hyzmatdaşlygy işjeňleşdirmek boýunça toplumyň wekilleriniň teklipleriniň öwreniljekdigini belledi. Ol bu pudakdaky gatnaşyklaryň yzygiderli ösdüriljekdigine ynam bildirdi.
