Türkmenistanyň Halk Maslahatynyň Başlygy Gurbanguly Berdimuhamedow ABŞ-a amala aşyran saparynyň çäginde Florida ştatyndaky «Panther» milli golf klubuna we «Sandhill Crane Golf Club» okuw-türgenleşik merkezine baryp gördi.
«Panther» klubunyň wekilleri ýokary derejeli myhmany golf meýdançalarynyň gurluşygynyň aýratynlyklary we olaryň häsiýetnamalary bilen tanyşdyryp, ABŞ-da sportuň bu görnüşi bilen köpçülikleýin meşgullanmak üçin giň şertleriň döredilendigini belledi.
Milli Lider meýdançalaryň ýagdaýy bilen tanşyp, Türkmenistanyň amerikan hünärmenleri bilen hyzmatdaşlygy giňeltmäge hem-de ýurtda şeýle desgalaryň sanyny artdyrmaga gyzyklanma bildirýändigini nygtady. Ol şeýle hem türkmen ýaşlarynyň arasynda, şol sanda Aşgabatda hereket edýän meýdançada golfa bolan gyzyklanmanyň artýandygyny belledi.
Klubuň wekilleri, öz gezeginde, türkmen kärdeşleri bilen tejribe alşylmagyna we bilelikdäki ýaryşlaryň geçirilmegine taýýardyklaryny mälim etdi.
«Sandhill Crane Golf Club» okuw-türgenleşik merkezi ABŞ-da 1992-nji ýyldan bäri hereket edýär. Myhmanyň gelmegi mynasybetli ol ýerde Türkmenistanyň dokma senagatynyň «Türkmenistanda öndürildi» nyşanly harytlarynyň, şol sanda nah ýüplüklerden taýýarlanan sport lybaslarynyň sergisi guraldy. Ekologik derejesi bilen ýokary halkara görkezijilerine laýyk gelýän dokma önümleri dünýä bazarlarynda bäsleşige ukyplydygy we isleg bildirilýändigi bilen tapawutlanýar. Bu bolsa dünýä brendli önümleri öndüriji hökmünde ösüşiň täze belentliklerine ynamly barýan Türkmenistanyň halkara abraýyny has-da berkitmäge ýardam edýär.
Merkezde türgenleşik işleriniň sanly tehnologiýalaryň ulanylmagy arkaly amala aşyrylýandygy, golf meýdançalarynyň bolsa saglygy berkitmegiň we sportuň, ozaly bilen bolsa ýaşlaryň arasynda ösdürilmeginiň möhüm şerti hökmünde garalýandygy bellenildi.
