«Kämil bilim» okuw merkeziniň Balkanabat şäherindäki şahamçasynda ýaşlaryň arasynda «Brain-ring» atly intellektual bäsleşik geçirildi. Ol üç tapgyrdan ybarat boldy.
Çäräni Balkan welaýat Baş bilim müdirligi, Magtymguly adyndaky Ýaşlar guramasynyň welaýat geňeşi we «Kämil bilim» merkeziniň Balkanabat şäherindäki şahamçasy bilelikde gurady.
Bäsleşige jemi 25 topar gatnaşdy. Olaryň arasynda Ýagşygeldi Kakaýew adyndaky Halkara nebit we gaz uniwersitetiniň Balkanabat bölüminiň, Balkanabat nebitçilik orta hünär okuw mekdebiniň, welaýat ýörite sungat mekdebiniň talyp ýaşlary, şeýle hem şäheriň umumybilim berýän mekdepleriniň 10–12-nji synp okuwçylary bar.
Fewral aýynda geçirilen saýlama tapgyry test görnüşinde guraldy. Onuň netijeleri boýunça toparlar finala çykmak ugrunda bäsleşigi dowam etdirdi. Jemleýji tapgyrda Halkara nebit we gaz uniwersitetiniň Balkanabat bölüminiň talyplary bilen Balkanabat şäheriniň 24-nji orta mekdebiniň okuwçylary duşuşdy.
Eminler toparynyň netijelerine görä:
- I orny — Ý.Kakaýew adyndaky Halkara nebit we gaz uniwersitetiniň Balkanabat bölüminiň talyplary;
- II orny — Balkanabat şäheriniň 24-nji orta mekdebiniň okuwçylary;
- III orny — Balkanabat şäheriniň 12-nji we 6-njy orta mekdepleriniň toparlary eýeledi.
Ýeňijilere Hormat hatlary we ýadygärlik sowgatlary gowşuryldy.
