Top Gear awtoulag şüweleňiniň muşdagy Nard Werbong öz söýgüli gepleşiginiň studiýasyny Lego konstruktoryndan dizaýn edip, gurnady. Bu maketi döretmek üçin oňa 5362 sany Lego bölejigi gerek boldy. Taýýar işiň suratlary Top Gear-iň resmi saýtynda çap edildi.
Kompozisiýa detallara aýratyn üns berlip taýýarlanylypdyr. Kiçijik studiýada hatda gepleşigiň alyp baryjylary — Jeremi Klarkson, Jeýms Meý, Riçard Hammond we Stig hem bar. Studiýanyň interýeriniň iň tanyş elementleri doly gaýtalandy. Awtoulaglaryň arasynda bolsa tomaşaçylara gowy tanyş bolan Toyota Hilux pikaby we elde ýasalan üç sany kemper (ýaşaýyş awtoulagy) bar.
Taslamany dizaýn etmek we gurmak üçin awtor 45-50 sagat töweregi wagt sarp etdi. Studiýanyň esasynyň ölçegi 90-a 90 santimetre deňdir.
Boş wagtlarynda Lego-dan awtoulag modellerini ýasamak bilen meşgullanýan Werbong, bu taslamanyň jikme-jik gollanmasyny we gerekli şaýlaryň sanawyny hem çap etdi. Bu bolsa islendik adama şeýle studiýany özbaşdak gurnamaga mümkinçilik berýär.
