Ýaponiýada Parkinson keselini bejermek üçin induksirlenen plýuripotent sütün öýjükleri (iPS-öýjükleri) esasynda işlenip düzülen derman serişdesini ulanmaga bölekleýin rugsat berildi. Bu barada Kioto uniwersitetiniň ýanyndaky iPS-öýjüklerini barlamak we ulanmak instituty habar berdi.
«Bu – öňe tarap ädilen iň wajyp ädim. Biz bu bejeriş usulynyň, mümkin boldugyça gysga wagtda hemme kişi tarapyndan ynanylýan standarta öwrülmegi üçin elimizde baryny ederis» diýip, institutyň direktory Dzýun Takahasi belleýär.
Işlenip düzülen derman iPS-öýjüklerinden ösdürilip ýetişdirilen nerw öýjüklerini öz içine alýar. Olar Parkinsonyň keselinden ejir çekýän näsaglara transplantasiýa edilmek üçin niýetlenýär.
Geçen ýylyň aprel aýynda Kioto uniwersiteti bu öýjükleriň göçürilip oturdylanyndan soň, käbir näsaglaryň ýagdaýynda oňyn üýtgeşmeleriň bolandygyny görkezýän kliniki synaglaryň netijelerini paýlaşdy. Awgust aýynda bolsa Sumitomo Pharma derman öndüriji kärhana bu önümi «Amshepuri» söwda markasy bilen tassyklatmak üçin arza berdi. Resminamalara tizleşdirilen tertipde seredildi.
Mundan başga-da, işemiýa kardiomiopatiýasyny bejermek üçin niýetlenen iPS-öýjükli derman hem bölekleýin tassyklama aldy. Häzirki wagtda bu dermanlaryň ikisiniň hem öz görnüşi boýunça ýeke-täkdigi bellenilýär.
