«Rolling Stone» žurnaly XXI asyrda «Oskar» baýragyna mynasyp bolan aktrisalaryň reýtingini düzdi. Sanaw taýýarlanylanda redaksiýa aktrisalaryň kino sungatyna goşan umumy goşandyna däl-de, hut olaryň baýrak getiren filmlerdäki işleriniň hiline baha berdi.
Birinji orny «Henizem Elis» (Всё ещё Элис) filmindäki keşbi üçin «Oskara» mynasyp bolan Julianna Mur eýeledi. Ol bu filmde Alsgeýmer keseliniň irki tapgyry ýüze çykarylan lingwistika professoryny oýnady.
«Bu üýtgeşik fiziki aýdyňlyk bilen görkezilen örän güýçli, adamyň içki dünýäsini açyp görkezýän oýundyr: aýalyň gorkusy, ykbalyna kaýyl bolşy we gahary Muruň gorky hem-de agyrydan doly gözlerinde görünýär» – diýlip, makalada bellenilýär.
Ikinji orunda «Şa aýaly» (Королева) filminde Ýelizaweta II-niň keşbini ýerine ýetiren we baýraga mynasyp bolan Helen Mirren ýerleşdi. Reýtingde aktrisanyň monarhy ýekemen, agras we daşyndan sowuk görnüşde görkezendigi nygtalýar.
Üçünji orny bolsa «Çarwalaryň topragy» (Земля кочевников) filmindäki keşbi üçin «Oskar» alan Frensis Makdormand eýeledi. Onuň oýnunda gahrymanyň häsiýetini, bilesigelijiligini we durnuklylygyny görkezýän tebigylyk bellenilýär.
Şeýle-de, ilkinji onluga Emma Stoun («Betbagt biçäreler»), Julia Roberts («Erin Brokowiç»), Maýki Medison («Anora»), Mişel Ýeo («Hemme zat hemme ýerde we birbada»), Keýt Blanşett («Jasmin»), Natali Portman («Gara guw»), Holli Berri («Nägehanlaryň baly») hem girdi.
25-nji orny «Demir hanym» (Железная леди) filminde Margaret Tetçeriň keşbi üçin «Oskar» alan Meril Strip eýeledi. «Rolling Stone-yň» pikiriçe, aktrisanyň at-abraýyna garamazdan, onuň bu filmdäki oýny karikatura häsiýetine eýedir.
