Dünýäniň iň uly sfera binasy hiç ýere uçmazdan, «Aýyň ýüzünde gezelenç etmäge» çagyrar

Moon World Resorts kompaniýasy «Moon» («Aý») atly täze taslamasyny hödürledi. Bu taslama dünýäniň iň uly sfera şekilli binasynyň gurluşygyny göz öňünde tutýar. Taslamanyň esasy maksady — binanyň içinde Aýyň ýüzünde gezelenç edýän ýaly duýgyny döredýän giňişlik döretmek.
Hödürlenen maglumatlara görä, gurluşynyň diametri 271 metre, beýikligi 312 metre deň bolan bina doly togalak görnüşde bolar. Hut şu aýratynlyk ony şeýle görnüşindäki binalaryň arasynda dünýäde iň uly we iň belent desga derejesine çykaryp biler.
Binanyň içinde 4000 otagly dynç alyş toplumyny we myhmanhanany ýerleşdirmek meýilleşdirilýär. Onuň aşaky gatynda kongres-merkezi, çäre geçirilýän meýdançalar, restoranlar we dynç alyş zolaklary bolar. Taslamanyň iň özboluşly tarapy bolsa, oňa gelýänleriň Aýyň üstüne meňzeş gurşawda gezelenç edip bilmeginde jemlenýär. Häzirlikçe onuň nähili usulda gurnaljagy mälim edilmeýär.
Taslamanyň anyk nirede amala aşyryljagy-da entek näbelli. Metbugat beýanatynda taslama üçin mümkin bolan ýurtlaryň arasynda Awstraliýa, Braziliýa, Hytaý, Müsür, Hindistan, Polşa, Ispaniýa, Tailand, ABŞ we Birleşen Arap Emirlikleri agzalýar. Resmi sanawa girmese-de, Saud Arabystanyna hem bu babatda potensial meýdança hökmünde seredilýär.
Kompaniýa ähli işler oňuna bolan ýagdaýynda toplumyň 2032-nji ýyla çenli açylyp biljekdigini mälim etdi. Häzirlikçe bolsa taslama konsepsiýa häsiýetine eýe bolmagynda galýar.