Ýewropanyň awiagurluşyk kompaniýasy Airbus özüniň giň fýuzelýažly flagman A350 uçarynyň has köp ýolagçy sygdyrýan görnüşini çykarmak mümkinçiligini öwrenýär. Bu barada kompaniýanyň baş direktory Giýom Fori 19-njy fewralda geçirilen ýyllyk brifingde mälim etdi.
Häzirki wagtda bu uçaryň iň uly görnüşi A350-1000 bolup, ol adaty gurluşynda 350-den 410-a çenli ýolagçyny sygdyryp bilýär. Ýöne Airbus bazaryň has agramly we uzyn uçara isleg bildirýändigine ünsi çekýär.
Täze uçar ölçegleri we ýolagçy sygymy boýunça Airbus-yň häzirki flagmanyndan öňe geçýän amerikan Boeing 777-9 uçaryna gönüden-göni bäsdeş bolmaga gönükdirilendir. Kompaniýanyň ýolbaşçysy fýuzelýažyň uzaldylmagyny «önümiň tebigy ewolýusiýasy» diýip atlandyrdy, emma gutarnykly kararyň heniz kabul edilmändigini belledi. Häzirki wagtda taslama «öý işi» tapgyrynda barýar: inženerler sargytçylaryň talaplaryny we tehniki çäklendirmeleri, şol sanda şeýle uçar üçin täze we has güýçli hereketlendirijileri ulanmak zerurlygyny seljerýär.
Airbus kompaniýasy Boeing bilen bäsleşmek üçin iň uly uçaryny ýene ulaltmak isleýär
- düýn 21:11
- 1.4k+
