Boeing kompaniýasy uçarlaryň esasy gurnama konweýerinden çykandygyna garamazdan, 787 Dreamliner laýnerlerini sargyt edijilere gowşurmagy saklaýar. Şeýle bökdençlige üpjünçilik zynjyryndaky meseleler sebäp boldy.
Kompaniýanyň maglumatlaryna görä, Boeing 787 uçarlaryna bolan sargytlaryň sany 1100-den geçýär. Emma birinji çärýegiň dowamynda müşderilere diňe 15 sany uçar gowşuryldy.
Boeing-iň ýolbaşçysy Kelli Ortberg esasy kynçylyklaryň uçarlaryň önümçiligi bilen däl-de, düzüm bölekleriniň üpjünçiligi bilen baglydygyny aýdýar. Hususan-da, gürrüň hereketlendirijiler we ýolagçy oturgyçlary barada gidýär.
Bu model üçin hereketlendirijileri General Electric we Rolls-Royce kompaniýalary üpjün edýär. Pandemiýadan soňra awiagatnawlara bolan islegiň artmagy öndürijileriň iş ýüküni köpeltdi, bu bolsa gijikdirmelere getirdi.
Biznes we birinji klas üçin niýetlenen oturgyçlaryň üpjünçiligi aýratyn mesele boldy. Şeýle oturgyçlar elektronika bilen enjamlaşdyrylan çylşyrymly gurluşlar bolup, olar hökmany şahadatnamadan geçmeli. Bu resminamalar bolmasa, uçarlary ulanmaga rugsat berilmeýär.
Häzirki wagtda Boeing üpjünçilik meselelerini çözmäge we eýýäm öndürilen uçarlary gowşurmaga ünsi gönükdirýär. Üpjün edijiler ýetmeýän detallary getirýänçä, täze uçarlar aerodromlarda saklanar.
