NASA agentligi geljekki Aý missiýalary üçin möhüm bölekleri üpjün etmekde United Launch Alliance kompaniýasyny saýlamagy meýilleşdirýär. Gürrüň «Vulcan» raketasynyň «Centaur V» diýlip atlandyrylýan ýokarky bölegi barada barýar. Bloomberg neşiriniň habar bermegine görä, agentlik Boeing kompaniýasy tarapyndan öndürilmegi meýilleşdirilen enjamlardan ýüz döndermek kararyna geldi.
Bu kararyň esasy sebäbi taslamanyň bahasynyň aşa ýokarlanyp, 2,8 milliard dollara ýetmegidir. Şeýlelikde NASA, ozal Boeing bilen «Space Launch System» (SLS) raketasynyň esasy böleklerini öndürmek we täze ýokarky basgançagy — «Exploration Upper Stage» döretmek barada köp milliardlyk şertnama baglaşandygyna garamazdan, işleriň gijikdirilmegini we çykdajylaryň artmagyny bahanalap, taslamany saklady we raketalary «standartlaşdyrmak» kararyna geldi.
Agentlik indi SLS raketasynyň dördünji uçurylyşynda «Centaur V» tizlendirji basgançagy ulanmagyň şertlerini öwrenýär. Bu taryhy missiýanyň çäklerinde NASA ýarym asyrdan gowrak wagtdan soň, ilkinji gezek adamlary Aýa ýollamagy meýilleşdirýär.
NASA-nyň ýolbaşçysy Jared Aýzekman 27-nji fewralda beren beýanatynda amerikan astronawtlarynyň Aýa 2028-nji ýylda gonup biljekdigini mälim etdi. Häzirki wagtda NASA Hytaý bilen boljak «Aý ýaryşy» üçin ykjam «bilini guşap», raketany Floridadaky Kennedi kosmos merkezine daşamak işlerini taýýarlanýar.
