Hindistan hökümeti geljek iki ýylyň dowamynda emeli aň infrastrukturasyna 200 milliard dollardan gowrak maýa goýumyny çekmegi meýilleşdirýär. Bu barada maglumat tehnologiýalary ministri Aşwini Waişnaw Nýu-Delide geçen «Emeli aňyň täsiri» sammitindäki çykyşynda aýtdy. Çärä EA pudagynda işleýän iri tehnologiýa kompaniýalarynyň ýolbaşçylary gatnaşdylar.
Maýa goýumlaryny çekmek üçin häkimiýetler salgyt ýeňilliklerini, döwlet wençur goldawyny we syýasy höweslendirmeleri hödürleýärler. Amazon, Google we Microsoft kompaniýalarynyň eýýäm ýurtda EA we bulut infrastrukturasyny ösdürmäge takmynan 70 milliard dollar goýmakçydygy mälim edildi. Mundan başga-da, hökümet EA goşundylaryna we beýleki tehnologiýalara 17 milliard dollara çenli maýa goýumyna garaşýar.
OpenAI hem Hindistandaky ornuny berkitmek üçin ýerli infrastruktura bil baglaýar. Kompaniýa Hindistanyň Tata Group konglomeraty bilen maglumat merkezleriniň 100 megawat kuwwatyny bölüp bermek barada ylalaşyk gazandy. Şeýle-de geljekde bu kuwwatyň 1 gigawata çenli artdyrylmak mümkinçiligine-de bil baglanýar.
Hindistan häzirden OpenAI üçin iň uly bazarlaryň birine öwrüldi. Kompaniýanyň ýolbaşçysy Sem Altmanyň baha bermegine görä, ýurtda ChatGPT-niň hepdelik ulanyjylar sany talyplardan başlap, telekeçilere çenli 100 milliondan geçýär. Hasaplamalaryň ýerli derejede ýerleşdirilmegi ýurduň içinde öňdebaryjy modelleri işe girizmäge, bökdençlikleri azaltmaga we döwlet düzümleri üçin maglumat saklamagyň talaplaryny berjaý etmäge mümkinçilik berer.
«IndiaAI Mission» maksatnamasynyň çäginde Hindistan umumy hasaplama kuwwatyny ýakyn wagtda häzirki 38 müň GPU-dan ýene 20 müň birlik artdyrmagy meýilleşdirýär. Maksatnamanyň indiki tapgyry ylmy-barlaglara, innowasiýalara we EA gurallaryna elýeterliligi giňeltmäge gönükdiriler.
Bellnenler bilen deň hatarda, ýurt elektron galyndylaryny gaýtadan işlemekde hem ösüş gazanýar. Hindistanda ýylda 3 million tonna çenli e-waste (elektron galyndy) emele gelýär, olardan EA we elektronika üçin zerur bolan litiý, kobalt, nikel we seýrek metallar alynýar. Bilermenler bu «şäher magdançylygynyň» potensialyny ýylda 6 milliard dollara çenli bahalandyrýarlar. Häzirlikçe galyndylaryň köpüsi resmi däl pudaklarda gaýtadan işlenilýär.
