Türkmenistanyň ilçisi ÝB-niň wekilleri bilen bilim we ylym pudagynda hyzmatdaşlygy maslahatlaşdy

Türkmenistanyň Belgiýadaky ilçisi Sapar Pälwanow Ýewropa Komissiýasynyň wekilleri — Bilim, ýaşlar, sport we medeniýet boýunça müdirliginiň (DG EAC) baş direktorynyň orunbasary Normunds Popens, şeýle hem Ylmy gözlegler we innowasiýalar boýunça müdirliginiň (DG RTD) baş direktory Mark Lemetr bilen duşuşyklary geçirdi. Bu barada Türkmenistanyň Belgiýadaky ilçihanasy habar berýär.
Normunds Popens bilen geçirilen duşuşykda taraplar bilim, ýaşlar syýasaty we medeni alyş-çalyş ulgamyndaky hyzmatdaşlygy çuňlaşdyrmagyň mümkinçiliklerini maslahatlaşdy. Pälwanow adam maýasyny ösdürmegiň Türkmenistanyň ileri tutulýan ugrudygyny nygtady we ýokary okuw mekdeplerinde hünärmenleri taýýarlamagyň bakalawr we magistratura modeli boýunça köp derejeli ulgamynyň ornaşdyrylýandygyny belledi. Türkmen tarapy bilimiň hilini üpjün etmek, akademiki işjeňlik, kredit-modul ulgamy, okuw işini sanlylaşdyrmak we uniwersitetleri dolandyrmak boýunça ýewropa çemeleşmelerine gyzyklanma bildirdi.
Türkmen ýokary okuw mekdepleriniň we ýaşlar guramalarynyň ýewropa maksatnamalaryna, şol sanda ýokary tehnologiýalar, sanly özgertmeler we «ýaşyl» ykdysadyýet babatdaky alyş-çalyşlara hem-de bilelikdäki taslamalara gatnaşmagy maslahatlaşyldy. Ýaşlarda ýolbaşçylyk we sanly endikleri ösdürmek maksatnamalaryna aýratyn üns berildi.
Mark Lemetr bilen geçirilen duşuşykda ylmy we innowasion ulgamlarda, şol sanda ýokary tehnologiýalar, emeli aň we ekologiýa gözlegleri babatda özara gatnaşyklary giňeltmegiň mümkinçiliklerine garaldy. Taraplar sebitiň howa wezipelerine, suw deňagramlylygyna we ählumumy howa üýtgemesiniň netijelerine üns berdi.
Türkmen tarapy ýewropaly hyzmatdaşlaryň gatnaşmagynda ekologiýa gözegçiligi we ylmy taslamalar üçin Sebit innowasiýalar we tehnologiýalar merkezini döretmegi teklip etdi.