Türkmenistanyň wekiliýeti Ženewada geçirilýän Içerki ulag boýunça komitetiň 88-nji mejlisine gatnaşýar

2026-njy ýylyň 17-nji fewralynda Ženewada BMG-niň Ýewropa ykdysady komissiýasynyň (ÝYK) Içerki ulag boýunça komitetiniň 88-nji mejlisi öz işine başlady. Halkara ulag syýasaty üçin möhüm meýdança bolan bu çärä Ministrler Kabinetiniň Başlygynyň orunbasary B.Annaýewiň ýolbaşçylygyndaky Türkmenistanyň wekiliýeti gatnaşýar. Bu barada Türkmenistanyň DIM-iniň metbugat gullugy habar berýär.
«Geljekki içerki ulag üçin innowasiýalary ilerletmek» diýen tema boýunça geçýän mejlisde dünýäniň dürli döwletleriniň ulag edaralarynyň ýolbaşçylary we halkara bilermenler bir ýere jemlendi. Gün tertibiniň esasy meseleleri awtomatlaşdyrmak, infrastrukturany sanlylaşdyrmak we halkara ulag ulgamlarynyň durnuklylygyny ýokarlandyrmak bilen baglanyşyklydyr.
Türkmenistanyň wekiliýetiniň ýolbaşçysy öz çykyşynda ýurtda ulag pudagyny sanlylaşdyrmagyň döwlet syýasatynyň strategik ugry bolup durýandygyny belledi. Hususan-da, elektron resminama dolanyşygynyň hukuk binýadyny döwrebaplaşdyrmak, «Demirgazyk-Günorta» we «Günbatar-Gündogar» ugurlary boýunça sanly ulag geçelgelerini döretmek, multimodal daşamalaryň sanlylaşdyrylmagy boýunça BMG-niň Ýewropa ykdysady komissiýasy bilen hyzmatdaşlygy giňeltmek meselelerine üns çekildi.
Şeýle hem, milli başlangyçlaryň Türkmenistanyň teklibi esasynda yglan edilen 2026-2035-nji ýyllar üçin Durnukly ulagyň onýyllygy bilen doly sazlaşýandygy nygtaldy.
Mejlisiň işi 20-nji fewralda tamamlanar we onuň netijeleri boýunça halkara ulag ulgamyny berkitmäge gönükdirilen resminamalaryň kabul edilmegine garaşylýar.