Türkmen oba hojalyk instituty ýurduň ýokary okuw mekdepleriniň talyplaryny geodeziýa boýunça geçiriljek V internet ders bäsleşigine gatnaşmaga çagyrýar. Oba hojalygynyň meliorasiýasy kafedrasy tarapyndan guralýan bu bäsleşik 16-njy aprelde şahsy görnüşde geçiriler.
Bäsleşige taýýarlyk ugruna garamazdan, her ýokary okuw mekdebinden bäş adama çenli talypdan ybarat toparlar gatnaşyp biler. Bäsleşik 50 soragdan ybarat bolup, olary çözmek üçin gatnaşyjylara 100 minut wagt berler. Ýeňijiler we baýrakly orunlary eýelänler toplanan ballaryna görä şahsy we toparlaýyn görnüşde kesgitlener hem-de I, II, III derejeli diplomlar bilen sylaglanar.
Bäsleşigiň maksady ýaşlaryň hünär endiklerini ösdürmek, ylmy işjeňligini höweslendirmek we geodeziýa ugrunda hünärmenleriň taýýarlyk derejesine baha bermekden ybarat.
Ýokary okuw mekdepleri öz toparlary we ýolbaşçylary baradaky maglumatlary 1-nji aprele çenli tohi_tm@sanly.tm elektron poçtasyna ugratmalydyr. Has giňişleýin maglumatlary we düzgünnamany institutyň resmi saýtyndan tapyp bilersiňiz.
Habarlaşmak üçin: +993 62 73-39-05; +993 64 26-41-60.
Türkmen oba hojalyk institutynda geodeziýa boýunça V internet ders bäsleşigi geçiriler
- 19.02.2026 14:05
- 1.4k+
