Sudanyň Baýuda çölünde geçirilen arheologik gazuw-agtaryş işleriniň dowamynda alymlar takmynan 4000 ýyl ozalky döwre degişli bolan täsin gubury ýüze çykardylar. Bu tapyndy biziň eýýamymyzdan öňki 2500–1500-nji ýyllar aralygynda gülläp ösen gadymy Nubia patyşalygy — Kerma baradaky bilinýän maglumatlary has-da baýlaşdyrdy.
Guburdaky erkek kişi arkan ýatyrylyp, kellesi-de gündogara tarapa bakdyrylypdyr. Aýaklarynyň bükülip, dabanynyň çanaklyk süňküniň üstünde goýulmagy bolsa, Kerma medeniýetiniň özboluşly "golýazmasy" hasaplanýar.
Biologik seljermeler bu adamyň örän berdaşly bolandygyny, ýöne ýarym çöllük ýerleriň agyr şertlerinde zähmet çekip, çäkli iýmitlenendigini görkezdi.
Onuň ýanyndan elde ýasalan iki sany keramika gaby tapyldy. Küýzäniň içinde kömre dönüp giden ösümlik galyndylary, haýwan süňkleri we tomzaklaryň bölekleri bar. Bu zatlar gabyň içine ýörite, belli bir yryma eýerilip salnypdyr.
Mundan 4000 ýyl ozal bu aramgähiň ýerleşýän baýyrlary häzirki ýaly gurak çöl däl-de, dürli otlar we gyrymsy agaçlar bilen örtülen çygly sähra çalymdaş bolupdyr.
Tapylan taryhy tapyndy bolsa, ähmiýetli ýadygärlik bolmak bilen birlikde, gadymy Nubia sebitiniň gündelik durmuşyna, däp-dessurlaryna we daşky gurşawyň wagtyň täsiri netijesinde nähili üýtgeşmelere sezewar bolandygyna düşünmäge ýardam edýär.
