17-nji fewralda Türkmenistanyň Bilim ministrliginde bu edaranyň ýolbaşçysy J. Gurbangeldiýew bilen BMG-niň Çagalar gaznasynyň (ÝUNISEF) Türkmenistandaky wekili Jalpa Ratnanyň arasynda duşuşyk boldy. Bu barada Bilim ministrliginiň metbugat gullugy habar berdi.
Duşuşygyň dowamynda taraplar 2026–2030-njy ýyllar üçin ikitaraplaýyn hyzmatdaşlygyň esasy ugurlaryny ara alyp maslahatlaşdy. Gepleşikleriň özeni çaganyň irki ösüşi, inklýuziw bilimi ösdürmek, şeýle hem bilim ulgamynda howanyň üýtgemegine durnuklylyk we tebigy heläkçilikleriň töwekgelçiligini azaltmak meseleleri boýunça meýilleşdirilýän işlerden ybarat boldy. Bu ugurlar boýunça eýýäm gazanylan netijelere aýratyn baha berildi.
Çaganyň irki ösüşi boýunça Milli strategiýany taýýarlamak, ýurduň 55 mekdebinde başlangyç synpa taýýarlyk boýunça synag maksatnamasyny amala aşyrmak, şeýle hem «Ýaşyl mekdep» atly bilelikdäki maksatnamanyň gidişi baradaky meselelere aýratyn üns berildi. Şeýle-de, inklýuziw bilim ulgamyndaky synag işleriniň gerimini giňeltmek barada pikir alyşyldy.
Duşuşygyň jemleri boýunça Türkmenistanyň Bilim ministrliginiň degişli bölümleriniň we ÝUNISEF-iň bilelikdäki başlangyçlary durmuşa geçirmegiň ähli tapgyrlarynda ýakyndan hyzmatdaşlyk etmäge hem-de her bir çaganyň bähbidine gönükdirilen gatnaşyklary mundan beýläk-de berkitmäge taýýardygy tassyklanyldy.
Türkmenistanyň Bilim ministrliginde ÝUNISEF-iň wekili bilen duşuşyk geçirildi
- 18.02.2026 15:43
- 3k+
