Italiýanyň meşhur Ferrari markasy özüniň ilkinji doly elektrikli modeli bolan Luce-niň içki bezegini görkezdi. 1000 at güýjünden gowrak kuwwaty bolan bu taslamanyň üstünde kompaniýa 2020-nji ýyldan bäri işleýär.
Luce-niň içki giňişligini dizaýn etmek wezipesi Apple kompaniýasynyň öňki meşhur baş dizaýneri (iPhone we iPad-iň awtory) Joni Aýwyň ýolbaşçylygyndaky dizaýn studiýasyna ynanyldy.
Salonda Apple-e mahsus bolan minimalizm duýulsa-da, Ferrari sürüjiniň "fiziki" duýuş äheňini saklap galdy. Ergonomika hünärmenleri her bir düwmäniň we tumblýorlaryň basylanda berýän mehaniki duýgusyna aýratyn üns berdiler.
Awtoulagyň dolandyryş paneli we ruly hakyky sungat eseri hökmünde häsiýetlendirilýär: Gurallar paneli dört sany tegelek segmentden ybarat. Geň galdyryjy tarapy — sanly tizlik görkezijiniň merkezinde hakyky mehaniki strelka ýerleşdirilipdir. Şeýle çözgüt displeýdäki sagatda hem ulanylýar.
Üç çişli rul 19 sany aýratyn alýumin bölekden, deriden we ýokary hilli plastikden ýasalypdyr. Ähli esasy funksiýalar (öwrüm yşyklary, aýna süpürgiçler, durnuklylyk sazlamalary) göni ruluň üstüne geçirilipdir.
Launch Control (çalt bat almak) we aýnany gyzdyryş düwmeleri adaty däl usulda — awtoulagyň potologynda (ýokarky panelde) ýerleşdirilipdir.
Luce modeliniň satuwa çykaryljak senesi heniz anyklanmady. Häzirki wagtda Ferrari bu ugurda güýçli bäsdeşlik bilen ýüzbe-ýüz: Hytaýyň elektrik awtoulag öndürijileri eýýäm 1500-den 2000 at güýjüne çenli bolan modelleri hödürleýärler.
