TÜRKSOÝ-yň ştab-kwartirasynda Oguz han adyndaky «Türkmenfilm» birleşiginiň 100 ýyllygy bellenildi

Türki medeniýetiň halkara guramasy (TÜRKSOÝ) Türkmenistanyň Türkiýe Respublikasyndaky ilçihanasynyň goldawy bilen «Türkmen kinematografiýasy: taryhy menziller we döwrebaplyk» atly halkara duşuşygy geçirdi. Bu çäre TÜRKSOÝ-yň ştab-kwartirasynda boldy we Oguz han adyndaky «Türkmenfilm» birleşiginiň 100 ýyllygyna bagyşlandy. Bu barada guramanyň resmi saýtynda habar berilýär.
Dabaraly çärä Türkmenistanyň medeniýet ministri Atageldi Şamyradow, TÜRKSOÝ-yň Baş sekretary Sultan Raýew, Türkmenistanyň Türkiýe Respublikasyndaky Adatdan daşary we Doly ygtyýarly ilçisi Mekan Işangulyýew, degişli pudak edaralarynyň wekilleri, kino sungatynyň işgärleri, alymlar we žurnalistler gatnaşdy.
Çäräniň açylyşynda Sultan Raýew «Türkmenfilmi» şanly waka bilen gutlap: «Bu asyrlyk ýol türkmen milli kino sungatynyň kemala gelmegini, ösmegini we çeperçilik taýdan kämilleşmegini görkezýän özboluşly medeni mirasyň nusgasydyr» diýip belledi. Ol türkmen kinosynyň türki halklaryň umumy medeni baýlygynyň aýrylmaz bölegi hökmündäki ornuny nygtady.
Atageldi Şamyradow milli kinematografiýanyň taryhynyň 1926-njy ýyldan başlanýandygyny ýatlatmak bilen, onuň ösüşiniň esasy tapgyrlary, şeýle hem «Türkmenfilmiň» häzirki mümkinçilikleri barada gürrüň berdi.
Çäräniň çäklerinde «Galkynyş atlary» atly gysga göwrümli film görkezildi we gatnaşyjylara minnetdarlyk şahadatnamalary gowşuryldy.