Beýik Britaniýada elektrik toguny simsiz geçirmek synag edilýär

Beýik Britaniýada elektriki energiýasyny hiç hili simsiz geçirmek boýunça täze taslama badalga berildi. Wireless Power Transmission diýlip atlandyrylýan bu taslama, adaty elektrik ulgamlaryny we kabelleri simsiz ulgamlar bilen çalşyp boljakdygyny ýa-da olary bar bolan infrastruktura bilen bilelikde ulanyp boljakdygyny öwrenýär.
Eger synag şowly geçse, bu tehnologiýa deňizdäki ýel generatorlaryndan alynýan energiýany gury ýere eltmegi aňsatlaşdyrar. Şeýle hem adaty elektrik liniýalaryny çekmek gaty gymmadyna düşýän çetki sebitleri elektrik energiýasy bilen üpjün etmäge mümkinçilik berer.
Taslamany 8 milliona golaý müşderä hyzmat edýän National Grid Electricity Distribution kompaniýasy amala aşyrýar. Olaryň hyzmatdaşy bolsa Oksfordyň Space Solar startapydyr. Bu startap öň hem mikrotolkunlaryň kömegi bilen gün energiýasyny emeli hemralardan Ýere geçirmegiň üstünde işläpdi. Indi bolsa şol tehnologiýa ýerüsti şertlere uýgunlaşdyrylýar.
Ulgam smartfonalryň simsiz zarýad berişine çalymdaş işleýär, emma has uly aralyklarda. Iberiji antenna elektriki togyny mikrotolkunlara öwürýär, kabul ediji antenna bolsa şol tolkunlary tutup, olary täzeden elektrik energiýasyna öwürýär.
Muňa garamazdan, simsiz geçirişde energiýanyň çekýän ýitgisi has uludyr, netijeliligiň koeffisienti häzirlikçe 40–50% töweregi. Adaty simli liniýalarda 100 km aralykda energiýanyň diňe 2–3%-i ýitýär.
Mundan başga-da, tehnologiýanyň adamlar we haýwanlar üçin howpsuzlyk meseleleri hem heniz doly çözülmän galýar.
Şunuň ýaly taslamalar bir wagtyň özünde Ýaponiýada, Täze Zelandiýada we ABŞ-da hem alnyp barylýar. NASA orbital gün stansiýalaryny döretmegiň we energiýany emeli hemralar arkaly Ýere ibermegiň mümkinçiliklerini öwrenýär.