Ýewropa Bileleşiginde kompaniýalara satylmadyk eşikleri, aýakgaplary we beýleki sarp ediş harytlaryny ýok etmegi gadagan edýän täze kadalar giriziler. Täze çäreler, her ýyl Şwesiýanyň umumy zyňyndylaryna deň bolan kömürturşy gazynyň bölünip çykmagynyň öňüni almak üçin 2026-njy ýylyň 19-njy iýulyndan başlap güýje girer diýip, Fashion Network portaly habar berýär.
Ýewropa Komissiýasynyň maglumatlaryna görä, diňeje Germaniýanyň onlaýn söwdasynda her ýyl 20 milliona golaý yzyna gaýtarylan haryt ýok edilýär. Brýusselde biznesiň haryt gorlaryny has netijeli dolandyrmaly diýip hasap edýärler. Şeýlelikde olar harytlary ýok etmegiň deregine ony ikilenç satmak, täzeden işlemek, haýyr-sahawat hökmünde bermek, gaýtadan ulanyşa goýbermek ýaly alternatiw usullary ulanýarlar.
Täze kadalaryň maksady galyndylaryň möçberini azaltmak, ekologiýa ýetirilýän zyýany peseltmek we durnukly biznes modellerini ulanýan kompaniýalar üçin deň şertleri döretmek bolup durýar. Munda, elbetde zeper ýeten harytlar üçin kadadan çykmalar hem göz öňünde tutulandyr.
Şonuň ýaly-da, 2030-njy ýyldan başlap, kompaniýalar ýok edilen satylmadyk sarp ediş harytlarynyň mukdary baradaky maglumatlary aýan etmäge borçly ediler. Ýewropada her ýyl satylmadyk matalaryň 4% - 9% aralygyndaky böleginiň entek ulanylmanka ýok edilýändigi bellenilýär. Munuň netijesinde takmynan 5,6 million tonna CO₂ zyňyndysy emele gelýär. Bu bolsa Şwesiýanyň 2021-nji ýyldaky jemi zyňyndylarynyň derejesine diýen ýaly deňdir.
