Arheologlar ABŞ-nyň Oregon ştatyndaky gowakdan çykan tapyndylary gaýtadan barlagdan geçirdiler. Alymlar olaryň arasyndaky ýüp hem-de tikilen sugun derisi — tikinçilik sungatynyň iň gadymy nusgasy diýen netijä geldiler. Artefaktyň ýasalanyna azyndan 12 müň ýyl bolupdyr diýip, Science Advance žurnaly habar berýär.
Bu tapyndy baryp, 1958-nji ýylda ýüze çykarylypdy. Emma oňa takyk derňew geçirmek diňe häzirki zaman usullary bilen mümkin boldy.
Alymlar ösümlik süýümlerinden we haýwanlaryň ýüňlerinden egrilen gadymy ýüpleri, süňkden ýasalan iňňeleri, deri böleklerini we şoňa meňzeş başga-da birnäçe zatlary barladylar. Ylmy makala görä, olaryň ählisi giçki pleýstosen döwrüne degişli. Radiokarbon derňewi deriniň takmynan 12 müň ýyl ozal ulanylandygyny görkezdi.
Barlagçylaryň pikiriçe, şeýle önümler eşik ýa-da ýapynja hökmünde hyzmat edip, adamlary sowukda doňup galmakdan gorapdyr. Şol döwre degişli ýerlerden tapylan köp sanly süňk iňňeleri hem muňa şaýatlyk edýär.
Ylmy işiň awtorlary bu barlagyň irki tehnologik ukyplaryň gadymy adamlaryň aman galmagyna, göçüp-gonmalaryna we medeni ösüşine nähili täsir edendigine has gowy düşünmäge kömek etjekdigini belleýärler.
