General-maýor Nazar Muhammetmyradowiç Atagaraýew, başga işe geçmegi sebäpli, Türkmenistanyň milli howpsuzlyk ministri wezipesinden boşadyldy. Bu wezipä general-maýor Döwletgeldi Gurbangeldiýewiç Meredow bellenildi. Degişli Permanlara Prezident Serdar Berdimuhamedow 14-nji fewralda Türkmenistanyň Döwlet howpsuzlyk geňeşiniň mejlisinde gol çekdi. Bu barada TDH habar berýär.
Mejlisde ýurdumyzyň harby we hukuk goraýjy edaralarynda şu ýylyň ýanwar aýynda alnyp barlan işleriň netijelerine seredildi.
Wezipä täze bellenen D.Meredow harby kasama ygrarlylygyň nyşany hökmünde Türkmenistanyň Döwlet baýdagyna tagzym edip, halkymyza, Watanymyza, Türkmenistanyň Prezidentine wepalylyk barada dabaraly kasam etdi.
Döwlet Baştutany ministrligiň täze wezipä bellenilen ýolbaşçysyna işinde üstünlikleri arzuw edip, öňde durýan ilkinji nobatdaky wezipelere ünsi çekdi hem-de bu düzümiň işini döwrebap derejede kämilleşdirmek boýunça degişli işleri alyp barmak babatda birnäçe anyk tabşyryklary berdi.
