BMW awtokonserni starteriň näsazlygy sebäpli dünýä boýunça ýüz müňlerçe awtoulagy yzyna çagyrýandygyny yglan etdi. Handelsblatt neşiriniň habar bermegine görä, bu näsazlyk ulagyň ot almagyna sebäp bolup bilýär.
Geçirilen barlaglaryň netijesinde, hereketlendiriji gaýta-gaýta işe girizilende starteriň magnitli öçürijisiniň çakdan aşa könelip biljekdigi anyklandy. Bu ýagdaý gysga utgaşmanyň ýüze çykmagy, ulagyň aşa gyzmagy we ýerli ýangyn howpy ýaly töwekgelçilikleri döredýär.
"Iň erbet ýagdaýda, bu näsazlyk ulag işläp duran wagty ýangyna sebäp bolup biler. Şeýle ýagdaýda ulag hereket edýärkä ýa-da sürüji ulagdan düşen wagty tüsse görnüp ýa-da onuň ysy gelip biler" diýip, BMW-de aýtdylar.
Haýsy modeller yzyna çagyrylýar?
Bu çäre BMW-nyň aşakdaky seriýalarynyň käbir modellerine degişlidir:
- Sedanlar we Kupe: 2 Series Coupe, 3, 4 we 5 Series, 7 Series Limousine, 6 Series Gran Turismo.
- Krossowerler we Rodster: X4, X5, X6 hem-de Z4.
kfz-Betrieb neşiri bu yza çagyryşyň takmynan 575 müň ulaga täsir edendigini aýtsa-da, BMW tarapy resmi taýdan anyk sany tassyklaman, "birnäçe ýüz müň" diýen jümle bilen çäklenmegi makul bildi.
Bu Mýunhen öndürijisiniň ýeke-täk uly möçberli yza çagyryşy däl. 2024-nji ýylyň güýzünde hem BMW tormoz ulgamyndaky (IBS) kemçilikler sebäpli 1,15 million awtoulagy yzyna çagyrypdy.
