2026-njy ýylyň 9-njy fewralynda Ýaponiýada Türkmenistanyň ilçisi A. Baýramowyň Türkmen-ýapon ylmy-tehnologik assosiasiýasynyň prezidenti H. Koýnuma we bu assosiasiýa bilen hyzmatdaşlyk edýän ýapon kompaniýalarynyň wekilleri bilen duşuşygy boldy.
Gepleşikleriň dowamynda esasy üns Türkmenistan bilen Ýaponiýanyň arasyndaky ylmy-tehnologik hyzmatdaşlygy mundan beýläk-de ösdürmäge, şeýle hem şu ugurda işleýän täze ýapon kompaniýalarynyň türkmen bazaryna çykmak mümkinçiliklerine gönükdirildi.
Duşuşyga gatnaşyjylar Tohkemy Corporation kompaniýasynyň mümkinçilikleri we tehnologik teklipleri barada pikir alyşdy. Bu kompaniýa Türkmenistanda suwy arassalamak üçin niýetlenen enjamlary we tehnologiýalary ornaşdyrmak bilen bagly işleri amala aşyrmagy meýilleşdirýär.
Şeýle hem Sustec we Carbon Cryo Capture Co., Ltd. kompaniýalarynyň mümkinçilikleri tanyşdyryldy. Bu kompaniýalaryň işi kwant duýujylygyny ulanmak arkaly ýerasty baýlyklary gözlemek üçin ýokary takyklykly tehnologik enjamlary öndürmek, şeýle-de suwuklandyrylan gaz ulgamynda kömürturşy gazyny bölüp aýyrmak tehnologiýalary bilen baglanyşyklydyr.
Türkmenistanyň ilçisi ýapon hyzmatdaşlary bilen ylmy-tehnologik gatnaşyklary maslahatlaşdy
- 12.02.2026 18:54
- 1.4k+
