Bred Pittiň gatnaşmagyndaky «F1» filminiň dowamy boljagy tassyklanyldy

Bred Pittiň baş keşbi janlandyran «F1» filminiň sikweli resmi taýdan taýýarlanylyp başlandy. Bu barada blokbasteriň prodýuseri Jerri Brukhaýmer Oskar baýragynyň gowşurylyş dabarasy mynasybetli agşam naharynyň  dowamynda BBC gullugyna beren interwýusynda tassyklady we «Biz filmiň dowamynyň üstünde işleýäris» diýip, aýratyn belledi. Şeýle-de bolsa prodýuser önümçiligiň möhletleri, aktyorlar düzümi barada jikme-jik maglumat bermedi, edil şonuň ýaly, Bred Pittiň öz keşbine dolanyp-dolanmazlygy baradaky soragy-da jogapsyz galdyrdy.
Aslynda film baradaky myş-myşlar 2025-nji ýylyň güýzünden bäri dowam edip gelýär. Şonda režissýor Jozef Kosinski onuň dowamyny surata düşürmek isleýändigini we häzirki wagtda toparyň döredijilikli gözlegler bilen meşgullanýandygyny aýdypdy.
«F1» filmi iýul aýynyň başyndan bäri Apple TV platformasynyň iň girdejili taslamasyna öwrüldi. Ol Ridli Skottyň «Napoleon» (221 mln dollar) we Martin Skorsezeniň «Gül Aýynyň ganhorlary» (158 mln dollar) filmlerini yzda galdyrdy. Filmiň ABŞ-daky premýerasy 27-nji iýunda geçirilipdi, sanly formatda bolsa ol 22-nji awgustda peýda boldy.
«F1» filminiň sýujeti boýunça, «Formula-1»-iň öňki ýaryşçysy Sonni Heýs (Bred Pitt) ýaş wagty başdan geçiren agyr heläkçiliginden soň ýoly taşlaýar. Ýöne aradan ýyllar geçensoň, ol ýaş sürüji Joşua Pirse (Damson Idris) ýardam etmek üçin yzyna dolanýar.