TimeOut neşiri dünýäniň iň gowy 18 pizzeriýasynyň reýtingini hödürledi. Sanaw žurnalyň dürli ýurtlardaky awtorlarynyň we redaktorlarynyň gatnaşmagynda taýýarlandy. Saýlamakda pizzanyň hili we kafeleriň nusgawy reseptlere bolan gatnaşygy göz öňünde tutuldy.
Makalanyň awtorlary pizzalaryň köpüsiniň birmeňzeş esasda taýýarlanýandygyny belleýär. Şol bir wagtyň özünde, käbir pizzeriýalar däp bolan reseptlere başgaça çemeleşip, hemmelere tanyş bolan bu tagamyň özboluşly görnüşlerini hödürlemegi başarypdyr.
Reýtingiň öňdebaryjylary şeýle görnüşde paýlandy:
Birinji orny Nýu-Ýorkdaky Mama’s Too pizzeriýasy eýeledi. Makalada doýgun peýnir tagamy bilen tapawutlanýan «Kaço e pepe» pizzasy maslahat berilýär.
Ikinji orna Rimdäki 180Grammi Pizzeria Romana mynasyp boldy. Hamyry ýuka bolan we artişok, wetçina, zeýtun we kömelek goşulan «Kapriçoza» iň şowly görnüş hökmünde görkezildi.
Üçünji orny Londonyň «Short Road» pizzeriýasy eýeledi. Makalada Londonyň pizza medeniýetiniň ösýändigi we bu ýerde pizzanyň kitirdewük görnüşde, rim stilinde hödürlenýändigi bellenilýär.
Dördünji orna tekstde pizzanyň watany diýlip atlandyrylan Neapoldaky Pizzeria da Attilio mynasyp boldy. Awtorlar bu ýerdäki «Margaritany» aýratyn belledi, onuň hili 1938-nji ýyldan bäri üýtgewsiz saklanyp gelýär.
Bäşinji orny Tokiodaky Pizza Marumo jemledi. Makalada ýapon we italýan aşhanalarynyň elementlerini utgaşdyrýan «Umami» pizzasyna üns bermek maslahat berilýär.
Şeýle-de, TimeOut sanawyna Ýohannesburg, Edinburg, Buenos-Aýres, Madrid, Sidneý, Keýptaun, Çikago, Kopengagen, Pariž, Rio-de-Žaneýro, Lissabon, Gonkong we Oahaka şäherleriniň pizzeriýalary girdi.
