Mämişi — üstünligiň öwüşgini: iPhone-yň Hytaýdaky satuwynyň «uçmagyny» täze reňkden görýärler

Bilermenler Hytaýda täze iPhone 17 telefonlaryna bolan uly hyrydarlygy enjamyň «kosmik mämişi» (cosmic orange) atly täze reňkdäki görnüşiniň peýda bolmagy bilen baglanyşdyrýarlar. Bu marketing göçüm, Hytaý häkimiýetleriniň smartfonyň täze emeli aň funksiýalaryny ulanmaga rugsat bermändigine garamazdan, Apple-e söwdasyny artdyrmaga mümkinçilik berdi.
Financial Times neşiriniň belleýşi ýaly, hytaý medeniýetinde mämişi reňk bagt, bereket we üstünlik getirýän reňk saýylýar. Şonuň ýaly-da ol bolçulygy, güýzi we energiýany alamatlandyrýar. Mundan başga-da, hytaý dilinde «mämişi» (橙色, chéng sè) we «üstünlik» (成, chéng) sözleri fonetik taýdan meňzeş eşidilýär. Neşir bu babatda ulanyjylaryň: «Goý, ähli arzuwlaryňyz mämişi bolsun!», «Goý, mämişi üstünlik şol bada gelsin!» diýen ýaly teswirlerini mysal getirýär.
Täze dizaýn sosial ulgamlarda çalt meşhurlyk gazandy. Fransuz lýuks brendi Hermès-iň önümlerine meňzeşligi sebäpli, oňa «Hermès mämişi» diýen at hem berildi.
Mundan ozal Hytaý bazary Apple üçin bökdençlik döredýärdi.  Üç ýylyň dowamynda söwda peselip, Huawei, Vivo we Xiaomi tarapyndan bäsdeşlik şonça ýokarlandy. Täze reňkdäki iPhone 17-niň çykmagy bilen ýagdaý düýpgöter üýtgedi. 2025-nji ýylyň dördünji çärýeginde söwda geçen ýyl bilen deňeşdirilende 38% ýokarlandy we kompaniýanyň umumy girdejisiniň tas bäşden bir bölegine ýetdi.
Hytaýdaky islegiň artmagy beýleki iri kompaniýalaryň görkezijileriniň peselýän wagtynda, soňky bir hepdede Apple-iň aksiýalarynyň bahasynyň 7% ýokarlanmagyna-da ýardam etdi.
Muňa goşmaça täsir hökmünde Huawei-iň awtoritetiniň gowşamagyny-da bellemek bolar. Maglumatlara görä, ulanyjylaryň HarmonyOS operasion ulgamynyň işinden edýän şikaýatlary sebäpli, kompaniýanyň söwdasy 2025-nji ýylyň soňky çärýeginde takmynan 10% peseldi.